Amy Lockwood: Shitja e kondomëve në Kongo

Unë jam reklamuese e reformuar, dhe tani punoj në zhvillim ndërkombëtar. Në tetor, shpenzova ca kohë në Republikën Demokratike të Kongos, që është vendi i dytë për nga madhësia në Afrikë. Në fakt është po aq e madhe sa Europa Perëndimore, por ka vetëm rreth 480 kilometra rrugë të shtruar. Republika Demokratike e Kongos është vend i rrezikshëm. Në dhjetë vitet e fundit 5 milion njerëz kanë vdekur për shkak të një lufte në lindje të vendit. Por lufta nuk është arsyeja e vetme për vështirësitë e jetës në Republikën Demokratike të Kongos.

Ka shumë probleme shëndetësore po ashtu. Në fakt, shkalla e përhapjes së virusit HIV është 1.3 përqind në mesin e të rriturve. Ky mund të duket sikur numër jo fort i madh, por në një vend me 76 milion banorë, do të thotë që janë rreth 930,000 njerëz të infektuar. Dhe për shkak të infrastrukturës jo të mirë, vetëm 25 përqind e tyre po marrin barnat për shpëtim të jetës që iu duhen. Kjo është pjesërisht arsyeja se pse agjensitë e ndihmave humanitare sjellin kondomë me çmim të ulët ose pa para.

Kështu që sa isha në Republikën Demokratike të Kongos, shpenzova shumë kohë duke folur me njerëzit në lidhje me kondomët, duke përfshirë edhe Damien. Damien drejton një hotel ne periferi të qytetit Kinshasa. Hoteli është i hapur vetëm deri në mesnatë, pra nuk është vend ku shpenzon natën. Por është vend ku vijnë punëtorët e seksit dhe klientët e tyre. Damien di çdo gjë në lidhje me kondomët, por ai nuk shet kondomë. Ai tha që nuk ka kërkesë. Kjo nuk është e befasishme, sepse vetëm tre përqind e njerëzve në Republikën Demokratike të Kongos përdorin kondomë.

Jozefi dhe Kristina, të cilët kanë një farmaci ku shiten edhe kondomët, thanë që përkundër faktit që agjensitë humanitare i sjellin kondomët me çmim të ulët ose pa para, dhe kanë fushata marketingu për kondomët po ashtu, konsumatorët e tyre nuk blejnë kondomët e firmave. Ata preferojnë kondomët gjenerik.

Mua si reklamuese kjo gjë m'u duk interesant. Kështu që fillova të shikoj se si duken këto fushata marketingu. Dhe del që ato përmbajnë tri mesazhe kryesore që përdoren nga agjensitë e ndihmës humanitare, dhe ato janë: frika, financat, dhe besnikëria. Ata i emërojnë kondomët me fjalë të tilla si "Vive" që do të thotë "të jetosh" ose "Besim". Ata i paketojnë me fjongo të kuq që na përkujton virusin HIV, i vendosin në kuti që na kujton se kush ka paguar për ato, tregojnë fotografi të bashkëshortes apo bashkëshortit dhe thonë që t'i mbrojnë ata apo të veprojnë me urtësi.

Por këto nuk janë gjërat që dikush mendon pak para se të shkojnë për të marrë një kondom. (Të qeshura) Për çfarë mendon pak para se të marrësh një kondom? Seks! Dhe kompanitë private që shesin kondomë në këto vende, e kuptojnë këtë. Fushatat e tyre të marketingut janë më ndryshe. Emri mund të mos jetë shumë më ndryshe, por imazhet natyrisht që janë. Disa lloje janë aspiruese, dhe natyrisht paketimi është jashtëzakonisht ngacëmues.

Kjo më bëri të mendoj që mbase agjensitë e ndihmës humanitare s'e kishin kuptuar një aspekt kyq të marketingut: njohja e audiencës. Dhe për agjensitë e ndihmës humanitare, fatkeqësisht, audienca zakonisht nuk janë njerëzit në vendin ku ata punojnë. Por janë njerëzit në vendet nga vijnë, njerëz që e mbështesin punën e tyre, njerëz si këta. Por nëse ajo që me të vërtetë po mundohemi të bëjmë është të ndalojmë përhapjen e virusit HIV, ne duhet të mendojmë për konsumatorët, njerëzit sjella e të cilëve duhet të ndryshojë -- çiftet, vajzat e reja, djemtë e ri -- jeta e të cilëve varet nga kjo gjë.

Ndaj mësimi është ky: nuk ka rëndësi se çfarë po shet; vetëm duhet të mendoni se kush është konsumatori juaj, dhe cilat janë ato mesazhe që do të bëjnë ata që të ndryshojnë sjelljen e tyre. Kjo mund të ju shpëtojë jetën atyre.

Ju faleminderit.

(Duartrokitje)