Џејн Чен: Топла прегратка што спасува животи

Ве молам затворете ги очите и отворете ги дланките. Сега замислете што можете да сместите во вашите дланки: јаболко, можеби вашиот паричник. Отворете ги очите. Што ако можете да сместите живот?

Ова што го гледате е недоносено бебе. Иако изгледа дека мирно одмара, тој всушност се бори за својот живот затоа што не може да ја регулира својата телесна температура. Бебево е многу ситно и нема доволно масти на своето тело за да ја задржи топлината. За жал, 20 милиони бебиња како ова се раѓаат секоја година ширум светот. Годишно умираат четири милиони од нив.

Но поголемиот проблем е фактот што оние кои успеваат да преживеат имаат сериозни здравствени проблеми во текот на целиот живот. Во првиот месец од животот на бебето единствената негова задача е да расне. Но, ако се бори со хипотермија, неговите органи не можат нормално да се развиваат, што доведува до голем број здравствени проблеми од дијабетес и срцеви болести, до низок коефициент на интелегенција. Замислете, колку од овие проблеми може да се спречат едноставно ако овие бебиња биле стоплени.

Тоа е примарната функција на инкубаторот. Но, на традиционалните инкубатори им е потребна електрична енергија и чинат до дваесет илјади долари. Поради тоа нема да можете да ги најдете во руралните делови од земијте во развој. Наместо инкубатори родителите се служат со локални решенија - врзуваат шишиња со топла вода околу телата на бебињата, или, ги поставуваат бебињата под светилки како овие на сликата - методи кои се истовремено неефективни и несигурни. Сум го видела ова многупати.

За време на едно од моите први патувања во Индија ја запознав женава, Севита, која само што беше родила мало недоносено бебе, Рани. Го однела бебето до амбулантата во најблиското село каде што докторот ја посоветувал да ја однесе Рани во градска болница за да може да ја стават во инкубатор. Но за да стигне до таму и требале преку четири часа. Севита немала како да стигне до таму и нејзиното бебе умрело.

Инспирирани од приказнава и дузина слични на неа, мојот тим и јас сфативме дека она што е потребно е локално решение, нешто што би работело без струја, што е доволно едноставно за да го користат мајките и бабиците, бидејќи најголем дел од бебињата се уште се раѓаат дома. Ни требаше нешто преносливо, нешто што може да се стерилизира и повторно да се употребува за повеќе деца, и нешто што е многу поефтино од 20 000 долари, колку што чини инкубатор во САД.

Така, дојдовме до ова решение. Ова што го гледате воопшто не изгледа како инкубатор. Изгледа како мала вреќа за спиење за бебе. Може целосно да се отвори. Водоотпорно е. Нема рабови внатре за да може лесно да се стерилизира. Но магијата е во оваа торбичка со восок. Ова е материјал кој менува фази. Тоа е супстанца слична на восок со точка на топење при човековата телесна температура, 37 степени целзиусови. Може да се стопи едноставно со помош на топла вода, а кога е стопен, тој може да зачува константна температура четири до шест часа при една употреба после што едноставно само повторно се загрева торбичката. И кога ќе се постави во овој џеб на задната страна, тој создава топла микро-средина за бебето.

Изгледа едноставно, но многу пати го проверувавме одејќи на терен и разговарајќи со лекари, мајки и клинички персонал, за да се осигураме дека навистина одговара на потребите на локалните заедници. Планираме да го лансираме производов во Индија во 2010. Предвидената цена ќе биде 25 долари, помалку од 0,1 процент од цената на традиционалните инкубатори.

Во наредните пет години се надеваме да ги спасиме животите на околу еден милион бебиња. Но на подолг период тоа ќе значи намалување на растот на населението. Тоа изгледа противречно, но се покажа дека ако се намали смртноста на децата се намалува и растот на населението, затоа што родителите не мораат очекуваат дека нивните бебиња може да умрат. Се надеваме дека грејачот за бебиња Embrace (прегратка) и други едноставни иновации како него ќе претставуваат нов тренд за иднината на технологијата: едноставни, локализирани, достапни решенија што имаат потенцијал за огромно влијание на општеството.

При неговото дизајнирање следевме неколку основни принципи. Навистина се обидовме да го разбереме крајниот корисник, во овој случај, луѓето како Севита. Се обидуваме да го разбереме коренот на проблемот наместо да сме пристрасни кон она што веќе постои. На крај дојдовме до наједноставното можно решение за овој проблем. Со ова, верувам дека можеме навистина да ја донесеме технологијата до народот. И можеме да спасиме милиони животи, едноставно преку топлината на една прегратка.