Гери Флејк (Gary Flake): дали Пивот е пресвртница во истражувањето на Интернет?

Ако избeрам една голема идеја која сакам да ја запаметите денес, тоа е дека целината на податоците со кои доаѓаме во контакт е поголема од збирот на составните делови, и наместо да мислите на преоптоварување со информации, сакам да размислувате како да ги искористиме информациите за да истакнеме шеми и да откриеме трендови кои инаку би биле невидливи.

Ова што го гледаме овде е типичен график кој ја прикажува стапката на смртност групирана по возраст. Алатката која ја употребувам е мал експеримент. Наречена е Пивот (Pivot) и она што можам да го правам со Пивот е да изберам да филтрирам по одредена причина за смрт, на пример незгоди. И веднаш гледам дека се појавува нова шема, бидејќи во централниот дел луѓето се најактивни, а овде се најчувствителни. Можеме повторно да погледнеме и да ги реорганизираме податоците според причината за смрт, па гледаме дека кардиоваскуларните болести и ракот се дежурни виновници, но, не за секого. Ако филтрираме по возраст, на пример 40 години или помалку, гледаме дека всушност незгодите се најголемата причина за која луѓето треба да се грижат. И ако навлеземе уште подлабоко, ова особено важи за мажите.

Значи, ја сфаќате идејата дека разгледувањето информации и податоци на овој начин е како пливање во море од информации. И ако можеме да го правиме ова со статистички податоци, зошто да не можеме со други содржини? Па еве, овде ги имаме насловните страници на сите изданија на Спортс Илустрејтед (Sports Illustrated) кои се досега објавени. Сите се тука. Сé е на Интернет мрежата. Може да го пробате ова насамо откако ќе завршам. Со Пивот може да навлезете во одредена декада. И во одредена година. Може директно да изберете конкретно издание. Јас го избрав ова и ги гледам спортистите кои се појавиле во ова издание; и спортовите. Бидејќи сум обожавател на Ленс Армстронг (Lance Armstrong) кликам на неговото име и ги добивам сите изданија во кои бил вклучен Ленс Армстронг.

[Аплауз]

Сега, ако сакам да ѕирнам наоколу и си помислам “А зошто да не ги видам сите изданија за велосипедизам?“, можам да се вратам еден чекор назад и да изберам велосипедизам. И го гледам Грег Лемонд (Greg Lemond). Мислам дека ја сфаќате идејата дека со движењето низ информациите на овој начин - зумирање, одзумирање, навлегување подлабоко, враќање назад - Вие не пребарувате и не прелистувате. Правите нешто малку поразлично. Нешто што е во средина, и за кое сметаме дека го менува начинот на кој се употребуваат информациите.

Сакам да се надоврзам и да ја проширам оваа идеја со нешто што е малку лудо. Она што го направивме овде е - ги зедовме буквално сите страни од Википедија (Wikipedia) и ги редуциравме до кратки сижеа. Сижето содржи кратка содржина и икона која ја означува тематската област на која припаѓа страната. Тука ги прикажувам само најпопуларните 500 страни од Википедија. Но, и со вака ограничен преглед можеме да направиме многу работи. Уште на прв поглед добиваме претстава кои се најпопуларните теми на Википедија. Еве, ќе изберам влада. Сега кога ја избрав темата влада, можам да видам дека категоријата на Википедија која најчесто соодветствува со оваа тема е човек на годината на магазинот Тајм (Time magazine People of the Year). И ова е навистина важно бидејќи е сознание кое не е содржано во ниту една страна на Википедија. Ова сознание може да се види само доколку се вратите чекор назад и ги погледнете сите страни одеднаш.

Додека гледам едно од овие сижеа, можам да навлезам подлабоко во концептот човек на годината на магазинот Тајм, и да ги прикажам сите кои му припаѓаат. Кога ги гледаме луѓето, може да се забележи дека најголем дел од нив доаѓаат од владата. Некои доаѓаат од природните науки. Уште помалку од бизнис заедницата. Еве го и мојот шеф. А само еден од музиката. И што е уште поинтересно, Боно (Bono) е добитник на наградата ТЕД (TED Prizе). Од тука, може да се префрлиме и да ги погледнеме сите добитници на наградата ТЕД. Па, гледате дека за прв пат се движиме низ мрежата како да е вистинска мрежа - не од страна до страна, туку употребуваме повисоко ниво на апстракција.

А сакам да ви покажам уште нешто што можеби ќе Ве изненади. Ја прикажувам веб страната на весникот Њу Јорк Тајмс (New York Times). Значи со Пивот, со оваа програма - не сакам да ја нарекувам прелистувач, бидејќи навистина не е тоа, но сепак може да се отвораат веб страни со неа - ја доведуваме технологијата на зумирање до секоја веб страна како оваа. Па, можам да се вратам чекор назад, и веднаш да зумирам конкретен сегмент. Причината поради која ова е особено важно е - со предноста која ја дава прегледувањето страни на овој начин, можам да ја видам мојата комплетна историја на прелистување на идентичен начин. Значи, можам да навлезам во она што сум го правел во одредени временски рамки. Овде, всушност, е состојбата на целата презентација која Ви ја прикажав. И можам повторно да ги прикажам работите кои сум ги гледал во текот на денот. Ако се вратам чекор назад и сакам да видам сè можам да ја истражувам целата историја, на пример, преку пребарувањата. Еве, правев малку непотистичко пребарување, го барав Бинг (Bing), а овде Лајв Лабс Пивот (Live Labs Pivot). И од овде, можам да навлезам во веб страните и повторно да ги отворам. Сè е една метафора, прикажана повеќе пати, и секој пат целината е поголема од сумата на деловите.

Значи, денес, во целиот свет, податоците ги сметаме за проклетство. Зборуваме за преоптоварување со информации. Зборуваме за задушување од податоци. А што ако можеме да го свртиме тоа наопаку, и да ја свртиме Интернет мрежата наопаку, па наместо една точка да води кон наредната, да се навикнеме да се движиме од многу точки кон уште повеќе, и да можеме да гледаме шеми кои инаку би биле скриени? Ако успееме, наместо да сме заглавени во податоците ќе можеме да ги извлечеме информациите. А, кога веќе работиме со информациите би можеле да дојдеме до знаење. Ако го имаме знаењето, можеби и мудроста нè чека некаде.

Со ова завршувам, и Ви благодарам.

[Аплауз]