Едит Видер: Чудесниот и прекрасен свет на биолуминесценцијата

Сакам да ве поведам на патување во еден вонземски свет. Ова не е патување за кое ќе ни требаат неколку светлосни години, туку тоа е патување до едно место кое е дефинирано од страна на светлината.

Значи, слабо е ценет фактот дека повеќето животни во океаните создаваат светлина. Поголемиот дел од мојата кариера го посветив на проучување на овој феномен наречен биолуминесценција. Го проучував бидејќи мислам дека неговото разбирање е основно за да се разбере животот во океанот каде што повеќето биолуминесценти се јавуваат. Исто така го користам и како алатка за визуелизација и за следење на загаденоста. Но најмногу поради тоа што ме привлекува. Уште од првиот пат кога нуркав со подморница за длабинско нуркање, кога бев доле и ги исклучив светлата и го видов тој огномет, уште тогаш станав зависник од биолуминесцентите. Но, кога ќе се вратев од нуркањето и ќе се обидев да го споделам тоа искуство со зборови, не можев да најдам соодветни зборови за тоа. Ми требаше некој начин за да можам дирекно да го споделам тоа искуство. И првиот пат кога го најдов начинот тоа беше во оваа мала подморница за една особа наречена Дип Ровер.

На следниот видео-клип ќе видите како ги стимулираме биолуминесцентите. А првото нешто што ќе го видите е пресек на екранот кој е околу еден метар во должина.

(Видео) Раскажувач: Пред подморницата, мрежниот екран ќе дојде во контакт со мекотелите суштества од длабокото море. Кога се исклучени светлата на подморницата, може да се види нивната биолуминесценција -- светлината која ја создаваат кога се судруваат со мрежата. Ова е прв пат таа да биде снимена.

Едит Видер: Го снимив тоа со појачана видео камера која има таква сензитивност како човечкото око кога потполно ќе се адаптира во темнина. Значи навистина тоа е она што би го виделе ако нурнете со подморницата. Но само за да ви го докажам тоа на вас, ви донесов овде малку биолуминесцентен планктон за да се обидам да изведам демонстрација во живо.

(смеење)

Па, ако може да ги исклучиме светлата и да направиме да биде најтемно што може, имам едно шише во кое има биолуминесцентен планктон. И забележувате дека сега не произлегува светлина од нив, или бидејќи веќе изумреле -- (смеење) или бидејќи треба да ги промешам малку за да можете да видите како изгледа биолуминесценцијата.

(Воздишки)

Опа. Се извинувам.

(смеење)

Поголемиот дел од работното време го поминувам во темнина; Навикната сум на тоа. Во ред.

Значи таа светлина беше направена од биолуминесцентна dinoflagellatea, тоа е едноклеточна алга. Но, зошто на една едноклеточна алга би и било потребно да продуцира таква светлина? Па, ја користи за да се заштити од предаторите. Светлото е како повик за помош. Тоа е познато како биолуминесцентен аларм за натрапници. И исто како алармот на вашата кола или вашата куќа, има улога да го насочи вниманието кон натрапникот, а следствено на тоа или да го изеде или да го избрка.

Има многу животни кои го користат овој трик, на пример оваa црна риба-змеј. Таа има светлечки орган под окото. Има мустаќи кај брадата. Има и многу други светлечки органи кои не можете да ги видите сега, но ќе ги видите за некоја минута. Моравме да ја бркаме со подморницата подолго време, бидејќи најголемата брзина на оваа риба е еден чвор (1,86 км/ч), а тоа беше и најголемата брзина на подморницата. Но вредеше, бидејќи ја фативме со посебна направа за ловење, ја однесовме во лабораторијата на бродот, и тогаш целото тело на рибата светеше. Тоа е неверојатно. Светлечките органи под очите светат. Мустаќите кај брадата светат. Има светлечки органи на стомакот кои светкаат, светла на перките. Тоа е повик за помош; тоа треба да привлече внимание. Тоа е феноменално. И нормално немате прилика да го видите ова, бидејќи кога ќе ги доведеме горе во мрежите, веќе сме ја исцрпиле нивната луминесценција.

Има и други начини со кои можете да се одбраните себе си со светлина. На пример, оваа шкампа ги испушта своите биолуминесцентни хемикалии во водата на истиот начин како што лигњата или октоподот испуштаат мастилав облак. Ова го заслепува или го попречува предаторот. Оваа мала лигња се вика фрлач на оган поради нејзината способност да го прави ова. Сега можеби ова изгледа како слатко залче, или како глава од свиња со крилја -- (смеење) но ако биде нападното, создава преграда од светлина -- всушност, преграда од фотонски торпеда. Едвај успеав навреме да ги исклучам светлата за да можете да ги видите овие зрнца светлина кои удираат во пресекот на екранот и потоа едноставно светат. Тоа е феноменално.

Има многу животни на отворено море -- многу од нив создаваат светлина. А ние имаме прилично добра идеја, за повеќето од нив, зошто го прават тоа. Тие го користат тоа за да најдат храна, за да привлечат партнер, за да се одбранат од предаторите. Но кога ќе се спуштите длабоко во океанот, таму работите стануваат навистина чудни. И некои од овие животни се веројатно инспирација за нештата кои ги видовте во филмот „Аватар“, но не морате да патувате до Пандора за да ги видите. Тие се нешта како ова.

Ова е златен корал, грмушка. Расте многу бавно. Всушност, се смета дека некои од нив се стари и по 3000 години, а тоа е една од причините поради која ловењето со мрежи по дното на морето треба да се забрани. Друга причина е и оваа неверојатна светлечка грмушка. Значи ако ја протрлате, на било кое место, ќе засветка оваа сино-зелена светлина која ви го одзема здивот. И ќе видите нешта како ова. Ова личи на нешто од книгата на д-р Seuss -- различни врсти на суштества низ сето ова. А ова се анемони муволовки. Ако ја допрете, таа ги собира своите пипала. Но ако продолжите да ја допирате, таа почнува да создава светлина. И всушност на крајот наликува на галаксија. Таа ги произведува овие нишки од светлина, веројатно како некоја форма на одбрана.

Има и морски ѕвезди кои можат да создаваат светлина. А има и нежни ѕвезди кои создаваат снопови од светлина кои танцуваат околу нивните краци. Ова личи на растение, но всушност е животно. Тоа се вгнездува во песокот со дување на еден балон на крајот од својот труп. Така може да се одржи и при многу силни струења, како што можете да видите овде. Но ако го земеме многу нежно, и ако го однесеме во лабораторијата и само го притиснеме на крајот од телото, тоа ја создава оваа светлина која се шири од дршката кон краевите, менувајќи ја при тоа бојата, од зелена во сина. Колоритноста и звучните ефекти се додадени за ваше задоволство при гледањето. (смеење) Но ние немаме поим зошто го прави тоа.

Еве уште едно. Ова е морски молив. Има една кревка ѕвезда која автостопира. Тоа е зелена сабја од светлина. И исто како она кое штотуку го видовте може да создава снопови од светлина. Па ако ја притиснам основата, сноповите одат од основата кон врвовите. Ако го притиснам врвот, тие одат од врвот кон основата. А што мислите дека ќе се случи ако го притиснам на средината? (воздишки) Многу ме интересираат вашите теории зошто ова се случува.

(смеење)

Значи постои јазик на светлината во длабокиот океан, а ние штотуку започнавме да го разбираме. Еден од начините да го правиме тоа е да ги имитираме повеќето од овие светлини. Ова е оптичка мамка која ја користев. Ние ја нарекуваме електронска медуза. Тоа се само 16 сини LED диоди кои може да се програмираат за да создаваат различни видови на светлина. Ние ја гледаме со систем за снимање кој јас го развив т.н. Око-во-морето кој користи инфрацрвена светлина со долга бранова должина, невидлива за повеќето животни, значи е дискретно. Па сакам да ви покажам некои од реакциите кои ги изнудивме од животните во длабокото море.

Значи камерата е црно бела. Нема висока резолуција. А она што го гледате овде е кутија со мамец со еден куп -- нешто како бубашваби во морето -- изоподи кои ја прекриле. А во предниот дел е електронска медуза. А кога ќе почне да светка, тоа ќе биде само една од LED диодите која светка многу брзо. Но веднаш штом ќе почне да светка -- и ќе изгледа многу големо, бидејќи се расцветува на камерата -- Сакам да гледате токму овде. Има нешто мало овде кое реагира. Ние зборуваме со некого. Личи на мал гердан од бисери, всушност, како три реда од бисери. И тоа е многу конзистентно. Ова беше на Бахамите на длабочина од 2,000 стапки. Ние всушност имаме соба за разговор овде, бидејќи еднаш штом започне, сите зборуваат. Мислам дека ова е всушност шкампа која ги испушта своите биолуминесцентни хемикалии во водата. Но кул е тоа што ние разговараме со неа. Не знаеме што и кажуваме. Лично, мислам дека е нешто секси.

(смеење)

А сега конечно, сакам да ви покажам некои реакции кои ги снимивме со првата во светот вебкамера за снимање во длабокото море, која ја инсталиравме во кањонот Монтереј минатата година. Ние сме на самиот почеток од анализирањето на овие податоци. Ова ќе биде најнапред светлечки извор, кое е како биолуминесцентна бактерија. А тоа е оптичка илузија дека има мрша на дното од морето. Така доаѓа овој мршојадец, кој е гигантска морска ајкула. И не можам со сигурност да тврдам дека оптичкиот извор ја привлекол, бидејќи таму е мамецот. Но ако го следела миризливиот дим, би дошла од друг правец. И всушност се чини како да се обидува да ја изеде електронската медуза. Тоа е 3,65 метри долга гигантска ајкула.

Во ред, ова што следи е од веб-камерата, и ќе биде прикажано тоа вртење. А ова е аларм за натрапници. А ова беше Hamboldt- ова лигња, млада Hamboldt-ова лигња, долга околу еден метар. Ова е на длабочина од 914 метри во кањонот Монтереј. Но ако ова е аларм за натрапници, не би очекувале да ја нападне медузата дирекно. Би требало да го нападне она нешто кое ја напаѓа медузата. Но ние видовме еден куп вакви реакции. Овој тип малку повеќе размислува. „Еј, чекај малку. Треба да има нешто друго овде.“ Тој размилсува за ова. Но упорен е. Постојано се враќа. А потоа си оди за кратко за да размисли уште малку, и мисли, „Можеби ако пријдам од друг агол.“ (смеење) Не.

Значи почнуваме да се прилагодуваме на ова, но сепак ова се само почетоци. Потребно е повеќе да се разгледа ова. Па ако некогаш некој од вас има прилика да нурка со подморница, без сомнение, треба да се обидете. Ова е нешто што би требало да биде на листата со желби на секого, бидејќи ние живееме на една океанска планета. Повеќе од 90 проценти, 99 проценти, од животниот простор на нашата планета е океанот. Тоа е магично место исполнето со светлечки спектакли кои го одземаат здивот и бизарни и необични суштества, вонземски животни форми кои за да ги видите не треба да одите на друга планета.

Но ако навистина некогаш нуркате, ве молам запомнете да ги исклучите светлата. Но ве предупредувам, може да станете зависници од ова.

Ви благодара.

(аплауз)