Кристофер „мут“ Пул: зошто да се биде анонимен на интернет

Том Грин: Тоа ти е 4chan (Форчан) работа. Има едни деца на интернет кои сакаат да кажуваат смешни зборови, како, на пример, „барел-рол“. Тоа ти е потег во видео играта Стар Фокс. Стар Фокс 20? (-Не, Стар Фокс 64.) Да. И ме зезаат веќе цела година. Мора да ти признаам, тоа ме излудува. Некогаш се будам сред ноќ и само викам: „Форчан“!

Кога имав 15 години открив една веб страница наречена Futaba Channel (Футаба Чанел). Тоа беше еден јапонски форум и имиџборд. Таквиот формат на еден форум, во тоа време, не беше многу познат надвор од Јапонија. Јас го превзедов, го преведов на англиски, и го поставив, за моите пријатели да го користат. Сега, шест ипол години подоцна, го користат преку 7 милиони луѓе, кои поставуваат и до 700.000 постови дневно. И се проширивме од еден на 48 панели.

Еве како изгледа. Она што е посебно кај оваа веб страница е тоа што е анонимна и нема никаква меморија. Нема архива. Нема бариери. Нема регистрација. Работите на кои сме навикнати кај обичните форуми не постојат на 4chan. Тоа доведе до дискусии, кои се сосема сирови и нефилтриарни. Страницата е позната по тоа што, поради својата специфична околина, го поттикна создавањето на многу интернет феномени, заразни видеа и што сè не, познати како „мемеа“.

Двете најголеми мемеа кои произлегоа од страницата - некои од вас можеби слушнале за LOLcats (лол-кетс) - смешни слики од мачки со текст. Ова очигледно допира до милиони луѓе, бидејќи има десетици илјади вакви слики, а денес постои и цела блогерска империја посветена на ваквите слики. И второто е, така да ја наречем, преродбата на Рик Астли во последниве две години. Рик-рол беше мамка. Многу едноставна, класична мамка. Некој вели дека става линк до нешто интересно, а всушност ве носи до поп песна од осумдесетите. Ова толку многу се рашири, што минатата година за време на Мејси парадата за Денот на благодарноста, Рик Астли излезе и рик-ролираше милиони луѓе на телевизија. (Смеа)

Има илјадници мемеа кои произлегуваат од оваа страница. Неколку од нив се провлекоа во мејнстримот, како овие што ви ги покажав, но секој ден, секој месец, луѓето создаваат илјадници вакви мемеа.

Дали една ваква веб страница има правила? Имаме. Ова се кодифицираните правила кои јас ги смислив, а кои претежно се игнорирани од страна на заедницата. Тие си составија свои сопствени правила, „Правилата на Интернетот“. Сакам да посочам три од нив. Правило број еден е дека не се зборува за /b/. Провило број два е дека НЕ се зборува за /b/. И ова е доста интересно: „Ако постои, има порно за истото. Без исклучоци.“ (Смеа) Ќе ве поштедам од тој слајд. Ве уверувам дека тоа е многу точно.

/b/ е првиот панел со кој почнавме, и на многу начини тоа е самото срце на веб страницата. Тоа е третиот најкористен дел од страницата. А, /b/ е познат, повеќе од што било, не само по мемеата кои се создадоа, туку и по експлоатацијата. Крис го спомна тоа пред малку, а тоа е анкетата 100 на Тајм (Time). Значи, некој во списанието Тајм мислел дека ќе биде забавно да ме номинира во оваа анкета што ја имаа минатата година. Па, ме номинираа, а интернетот и мојата заедница некако дознале за тоа и решиле дека сакаат јас да победам. Јас не им го наложив ова, едноставно решиле дека сакаат така да биде. Рејтинг од 390% и не е така лоша работа. (Смеа) И така ја пробија анкетата и јас бев на самиот врв, па бев поканет да присуствувам и на една многу луксузна забава.

Ама тоа не е интересното во врска со ова. Работата е што не сакале само да бидам прв на листата, туку, всушност... тактиката била толку софистицирана, што наместиле од првите 21 место да се добие фразата „mARBLECAKE. ALSO, THE GAME.“ (слоб. прев - намерно скриена порака). (Смеа) Количината на време и труд кои биле потрошени на тоа е апсолутно неверојатна. А, „marble cake“ е значаен затоа што тоа е каналот кој го организираше една група наречена Анонимци. Анонимци е една група луѓе, која протестираше против саентологијата. Значи, имаше едно засрамувачко видео со Том Круз, кое се најде на интернет. Саентолозите успеале да го симнат некако и притоа да разлутат дел од интернетот. Па, така, овие луѓе, над 7.000 на број, за помалку од еден месец се организираа во различни градови низ светот - ова е Лос Анџелес - и протестираа против црквата на саентологијата. Сè уште го прават тоа. И денес, цели две години по случката, тие уште протестираат. (Смеа) Значи, тоа е една група на активисти, која произлезе од оваа страница.

И на крај, ќе ви покажам еден пример, приказната за мачката Дасти. Дасти е името на мачката. Еден дечко објави видео на ЈуТјуб од тоа како ја измачува својата мачка. Тоа баш и не им се допадна на луѓето, па се создаде цел бран на поддршка, луѓето бараа да се превземе нешто во врска со тоа. Она што го направија... крим-техника вода може да им носи, вистински интернет детективи. Го најдоа неговиот профил на MySpace, ги споредија сликите со она што се гледа на видеото на ЈуТјуб. И во рок од 24 часа дознаа како се вика, а за 48 часа тој беше уапсен.

(Аплауз)

Она што е привлечно за една заедница како 4chan е тоа што таа е едно отворено место. Како што споменав, сирово е и нефилтрирано. Ваквите веб страници ги следат диносаурусите. Загрозени се, бидејќи се движиме кон социјални мрежи. Се движиме кон сеприсутен идентитет. Се движиме кон... би рекол, недостик на приватност, всушност. Жртвуваме голем дел од приватноста и мислам дека при тоа, при движењето кон тие работи, губиме нешто вредно.

Благодарам.

(Аплауз)

-Благодарам. Имам неколку прашања за тебе. Ама, ако ги поставам, ќе падне ли веб страницата на ТЕД?

-Имате среќа што ова не се пренесува во живо во моментов.

-Е, па, никогаш не се знае. Нè гледаат луѓе од 75 земји. Не кажувајте. Но, сериозно... проблемот со анонимноста е што... мислам, ти го изложи твојот став, но анонимноста им дозволува на луѓето да кажат што било. Нема правила. И ти се соочи со проблемот на детската порнографија. Ме интересира дали некогаш лежиш навечер и се прашуваш да не си ја отворил кутијата на Пандора?

-Да и не. Мислам... колку добро и да произлегува од оваа околина, има и многу лушо. Има многу негативни страни. Но, мислам дека е постигнато поголемо добро со самото тоа што им е дозволено на луѓето... Денес нема многу места каде можеш да отидеш, да немаш никаков идентитет, да бидеш комплетно анонимен, и да кажеш што сакаш. Можноста да кажеш што сакаш е многу моќна. Можноста да правиш што сакаш е веќе преминување на линијата. Но, мислам дека е важно да постојат вакви места. Добивам мејлови, во кои велат „Благодарам за ова место, за овој вентил, каде можам да дојдам после работа и да бидам тој што сум.“

-Но, зборовите, зборувањето може да биде конструктивно, но и штетно. И ако се прекине врската помеѓу она што е кажано и оној што го кажал тоа... сигурно има голем ризик тука.

-Има... секако. Но...

-Кажи ми... мислам дека го постави прашањето на форумот за тоа што би можел да зборуваш на ТЕД, така?

-Да, отворив тема во неделата. И во рок од 24 часа имаше преку 12 илјади одговори. Работата е што... не ги вклучив во презентацијата, затоа што не можам да ви прочитам што кажаа. (Смеа) 99% од сето тоа би било исцензорирано. Но, имаше и некои добри работи. (Смеа) Беа спомнати љубовта и мирот.

-Љубов и мир, ама со наводници околу нив, така?

-Беа спомнати и мачки и кучиња. -Тоа сега е тргнато од форумот? Го нема? Или сè уште е таму?

-Ја поставив темата да може да се гледа неколку дена, имаше околу 16.000 постови, и сега е симната.

-Добро... И така не сум сигурен дека ќе им препорачав на сите овде вечерва да ја видат. А, ти, Крис? И ти претставуваш одредена интрига. Имаш изненадувачко полу-подземно влијание, но тоа сè уште не ти носи пари. Која е комерцијалната слика тука?

-Комерцијалната слика и ја нема баш. Веб страницата има содржина за возрасни. Јасно е дека има многу непристојни содржини, дури и само кога станува збор за јазикот. А, во тој случај, веќе сте жртвувале секоја надаж за вадење многу пари.

-Ти сè уште живееш со твоите родители, така?

-Всушност, неодамна се иселив.

-Тоа е супер.

(Аплауз)

-Се иселив од дома и пак сум на факултет.

-Какви разговори водеше или сè уште водиш со мајка ти за 4chan?

-На почетокот, многу болни и чудни разговори. Содржината на страницата не е баш тема за лесен муабет. Но, моите родители... мислам дека дел од причината зошто можат да го ценат ова, на некој начин, е затоа што не можат да го разберат. (Смеа) -Но, сигурно им беше мило да те видат на врвот на анкетата на Тајм.

-Да, ама сè уште не знаат како да го сфатат тоа.

(Смеа)

-Каде се гледаш себеси за некои 10 години, што мислиш дека ќе правиш?

-Тоа е добро прашање. Како што реков, само што се вратив на факултет, и планирам да диполомирам во урбани студии, а потоа да одам на урбано планирање. На некој начин да земам сè што научив од онлајн заедниците и да се обидам тоа да го адаптирам на физичката заедница.

-Крис, фала ти. Апсолутно фасцинантно. Благодарам што дојде на ТЕД.