Кристиен Меиндертсма: Како свинските делови го вртат светот

Здраво. Би сакала да го започнам мојот говор со две прашања, и првото е: Колку од вас тука всушност јадат свинско месо? Ве молам дигнете рака. О, тоа е многу. А колку од вас навистина во живо виделе свиња од која се произведува ова месо? Во последнава година?

Во Холандија, од каде што доаѓам, во суштина никогаш и не гледате свиња, што е навистина чудно, бидејќи со население од 16 милиони луѓе имаме 12 милиони свињи. Добро, се разбира дека холанѓаните не може да ги изедат сите тие свињи. Тие јадат околу една третина, а останато се извезува на различни страни на Европа и во останатиот дел од светот. Многу се извезува во Велика Британија, Германија.

Бев љубопитна, бидејќи историски гледано, се користела целата свиња до последниот дел за ништо да не се фрли... Значи бев љубопитна да дознаам дали тоа е сѐ уште така. Потрошив околу три години истражувајќи. Следејќи ја оваа една свиња со број „05049“, сѐ до самиот крај и до производите, кои беа направени од свињата. И во овие години, запознав секакви типови луѓе, како, на пример, фармери и касапи, што е логично. Но, исто така запознав производители на алуминиумски калапи, производители на муниција и секакви други типови на луѓе. И тоа што ме изненади е што фармерите и немаа поим што сѐ беше произведувано од нивните свињи. Но и потрошувачите -- т.е. ние -- немаа поим за свињите во сите овие производи.

Така што го земав целово истражување и направив, па во суштина, каталог на производи од оваа една свиња. И дури има копија од маркерот за уво на задната страна. Се состои од четири поглавја. Поглавјата се кожа, коски, месо, внатрешни органи, крв, сало и разно. (Смеа) Вкупно тежат 103,7 килограми. И за да ви покажам колку често во еден нормален ден всушност сретнувате делови од оваа свиња, ќе ви покажам некои фотографии од книгата.

Веројатно го започнувате денот со туширање. Во сапунот, масните киселини направени со варење на маснотиите од свинска коска се користат како средство за стврднување, но исто така и за да му дадат мазен свиленкаст ефект. Ако погледнете наоколу во бањата, гледате многу производи како шампон, балсам, крема против брчки, лосион за тело, но и паста за заби. Така, уште пред доручек, ја сретнавте свињата толку многу пати. Потоа, за доручек, свињата која ја следев, влакната од свињата или белковините од влакната на свињата, биле искористени како оплеменувач на тесто. (Смеа) Па, како што кажува производителот: се „подобрува.“ Се разбира, знаете. Во ниско-масен путер, во суштина во многу ниско-масни производи, кога ќе ја извадите маснотијата, во суштина го вадите вкусот и текстурата. Па тоа што прават е, го враќаат желатинот за да се сочува текстурата.

Кога одите на работа, под улиците или под зградите кои ги гледате, има шанса да има „клеточен“ бетон, што е многу лесен тип на бетон кој во себе има белковини од коски, и исто така е целосно повторно употреблив. Во кочниците на возови, барем во германските кочници за возови, има еден дел од кочницата кој е направен од коскена пепел. И во чискејк и во различни типови на десерти, како чоколадна пена, тирамису, пудинг од ванила, сѐ што се чува изладено во супермаркет, има желатин за да изгледа убаво. Фин порцелан од коска -- ова е вистинска класика. Се разбира, коската во финиот порцелан од коски му ја дава проѕирноста и цврстината, за да може да се направат овие навистина убави фигури, како овој елен.

Во внатрешното уредување, свињата е навистина присутна. Се користи во боите, за текстурата, но исто така и за сјајноста. Во шмирглите, лепак од коски е всушност лепакот помеѓу песокот и хартијата. А и во четките за фарбање, се користат влакна, бидејќи поради нивната издржливост влакната се пригодни за правење на четки за фарбање.

Не планирав да ви покажувам месо, бидејќи се разбира половина од книгата е за месо, и веројатно сите знаете за какво месо. Но не сакав да го пропуштите ова, кое се вика „месо исечено во контролирани порции.“ Ова во суштина се продава во замрзнувачите во супермаркетот. И тоа е... па во суштина стек. Тоа се продава како говедско месо, но што се случува кога колете крава -- барем во големи фабрики-кланици -- на нив им остануваат овие мали делови од стек кои неможат да ги продаваат како стек, па тоа што го прават е што ги „лепат“ заедно со фибрин од свинска крв во еден навистина голем колбас. Потоа го замрзнуваат колбасот, го сечат на мали парчиња и тоа повторно го продаваат како стек. Ова истото се случува и со туна и со скалоп школки. Со стекот, можеби ќе се напиете и пиво. Во процесот на превривање, во пивото се прават многу магливи елементи, па за да се тргнат тие елементи, некои компании го преточуваат пивото низ еден тип на сито од желатин за да се исчисти магловитоста. Ова истото се прави и со вино и со овошни џусеви.

Всушност има компанија во Грција која произведува цигари што содржат хемоглобин од свињи во филтрите. И според нив, тоа создава вештачки бел дроб во филтерот. (Смеа) Тоа всушност е поздрава цигара. (Смеа) Колаген за вбризгување -- или, почнувајќи од 1970-тите, колаген од свињи -- се користи за вбризгување во брчки. Причината за ова е што свињите се впрочем многу блиски до луѓето, па и колагенот исто така. Па, ова можеби е најчудното што го најдов. Ова е куршум произведен од една многу голема компанија за муниција во САД.

И додека ја подготвував книгата контактирав со сите производители, бидејќи сакав да ми пратат вистински мостри и вистински примероци. Па на оваа компанија ѝ пратив е-пошта велејќи: „Здраво, јас сум Кристиен. Правам едно истражување. Може ли да ми пратите еден куршум?“ (Смеа) И искрено, не ни очекував да ми одговорат. Но, одговорија и ми кажаа: „Многу ви благодариме на вашата порака. Многу интересна приказна. Дали сте некако поврзани со холандската влада?“ Тоа ми беше многу чудно, како холандската влада да праќа е-пораки некому.

(Смеа)

Најубавото нешто што го најдов, барем тоа што мислам дека е најубавото во книгата, е овој срцев залисток. Toа многу ниско-технолошки и многу високо-технолошки производ во исто време. Ниско-технолошкиот дел е тоа што буквално е свински залисток монтиран во високо-технолошки дел, во специјално метално куќиште. Тоа што се случува, е што ова може да биде вградено во човечко срце без операција на отворено срце, и во моментот кога е на вистинското место ја тргаат надворешната школка. Тогаш срцевиот залисток ја добива оваа форма и во истиот момент почнува да чука. Тоа е еден магичен момент. Ова е една холандска компанија. Па им се јавив и ги замолив, „Дали може да ми позајмите еден срцев залисток?“ И производителите беа навистина ентузијастички расположени. Ми рекоа: „Супер, ќе го ставиме во тегла со формалин и ќе може да го позајмите.“ Супер. Но, потоа немав никаков контакт од нив со седмици, па им се јавив, и ги прашав „Што се случува со срцевиот залисток?“ Одговорот беше: „Па видете нашиот директор одлучи да не ви дозволи да го позајмите срцевиот залисток, бидејќи не сака неговиот производ да се асоцира со свињи.“

(Смеа)

Па, последниот производ од книгата кој ќе ви го покажам е обновлива енергија -- впрочем да покажам дека моето прво прашање, дали свињите сѐ уште се користат цели, има потврден одговор. Па да, има. Бидејќи сѐ што неможе да се искористи за нешто друго се користи за гориво кое може да се користи како обновлив извор на енергија.

Вкупно најдов 185 производи. Тоа што тие ми покажаа е, прво, би рекла малку чудно, што не се однесуваме кон овие свињи како апсолутни кралеви и кралици. И второ, дека немаме поим од што сѐ се направени овие производи кои нѐ опкружуваат.

И можеби мислите дека сум голем љубител на свињи, но всушност, добро малку и сум, но сепак во повеќе сум љубител на суровини. И мислам дека, првиот чекор за подобро да се грижиме што е во позадина на нашите производи -- животните, земјоделските култури, растенијата, необновливите материјали, но и луѓето кои ги прават овие производи -- е да станеме свесни дека тие се тука.

Многу ви благодарам.

(Аплауз)