Алисон Хант добива (нов) колк

Моите три минути сеуште не почнаа, нели?

Крис Андерсон: Не, не може да го започнеме одбројувањето на трите минути. Ресетирај ги трите минути, сепак не е фер.

Алисон Хант: Ох Боже, напорно е овде горе. Мислам, секако сум нервозна.

Но не сум толку нервозна како што бев пред пет недели. Пред пет недели имав операција за целосна замена на колкот -- дали ја знаете таа операција? Електрична пила, дупчалка, тотално одвратно. Освен ако не сте Дејвид Болински, во тој случај тоа сè е вистина и убавина. Секако Дејвид, ако не е твојот колк, тогаш е вистина и убавина.

Во секој случај, имав големо октровение во врска со ситуацијата, па Крис ме покани да ви раскажам за него. Но прво треба да дознаете две работи за мене. Само две работи. Јас сум Канаѓанка и тоа најмладото од седум деца. Сега, во Канада, ние имаме одличен систем на здравствена заштита. Што значи ги добиваме нашите нови колкови бесплатно. А како најмало од седум деца, јас никогаш не сум била прва на ред за било што. Јасно?

Така, мојот колк ме болеше со години. Кога конечно отидов на доктор, што беше бесплатно, таа ме прати на ортопедски хирург, исто така бесплатно. Конечно го сретнав по 10 месеци чекање -- скоро цела година. Е тоа добивате бесплатно. Се сретнав со хирургот, тој ми направи неколку бесплатни рентген снимки, а потоа добро ги проучи... и знаете, дури и јас можев да видам дека колкот ми е за никаде. А јас всушност работам маркетинг. Така тој рече: „Алисон, мора да одиш под нож. Ќе го заменам твојот колк -- треба да чекаш околу 18 месеци.“ Уште 18 месеци. Веќе чекав 10 месеци, а сега требаше да чекам уште 18.

Знаете, тоа е толку многу чекање што јас всушност почнав да го сметам во однос на ТЕД-ови. Немаше да имам нов колк за овој ТЕД, намаше да имам нов колк за ТЕДГлобал во Африка, и немаше да имам нов колк за ТЕД2008. И сеуште ќе морав да одам со мојот болен колк. Колку разочарувачки.

Така, ја напуштив ординацијата и одев низ болницата, кога го доживеав откровението. Ова седмо дете мораше да застане на чело на редот. Така де.

Ви кажав колку е тоа не-канадски? Ние не размислуваме на тој начин. Ние не зборуваме за тоа -- уф -- дури не го земаме предвид. Всушност, кога патуваме во странство, така ги препознаваме другите Канаѓани. „После Вас.“ „О, не, не. После Вас“ Еј, да не си од Канада „Оо и јас исто! Здраво!“ „Прекрасно! Одлично!“

Ааа не, одеднаш не ми беше одбивно да шутнам некое старче од списокот. Некој седумдесетгодишник што сака нов колк за да продолжи со голф или градинарство. Не, не. На чело.

Така што веќе одев низ лобито, што секако, ме болеше, поради мојот колк, па на некој начин ми требаше знак. И видов еден знак. Во излогот на малечката болничка продавница за подароци имаше натпис на кој пишуваше „Се бараат волонтери.“ Хмм. И, веднаш ме примија. Без проверки на препораки, ништо од вообичаените прашања, не. Тие беа очајни за волонтери бидејќи просечната возраст на волонтери во болничката продавница за подароци беше 75. Да. Им требаше малку млада крв.

Така што, веднаш си го добив мојот светлосин волонтерски елек, добив и пропусница со фотографија и целосна обука од мојот 89-годишен претпоставен. Работев сама. Секој петок наутро, бев во продавничката. И додека на касата ги наплатував Тик-так бонбончињата за болничкиот персонал, прашував необврзно „А што работите?“ Тогаш ќе им кажев „Паа, ќе ми го сменат колкот -- за 18 месеци. Супер ќе биде кога ќе ми престане болката. Ау!“ Целиот персонал ја запозна решителната, млада волонтерка.

Мојот нареден преглед кај хирурогот, случајно, беше веднаш по мојата смена во продавничката. Така што, нормално, си го носев елекот и пропусницата. И ноншарлантно ги префрлив преку столицата во ординацијата И знаете, кога тој влезе... Се гледаше дека ги виде. По неколку минути, имав закажана операција за некоја недела, и рецепт за голема доза за Перкоцет.

Е сега, чаршијата вели дека всушност моето волонтирање ме доведе на чело на списокот. И знаете, дури и не се срамам од тоа. Две причини. Прво и основно, навистина ќе се грижам за новиов колк. А исто така, планирам да продолжам да волонтирам, што всушност ме доведува до најголемото откровение. Дури и кога Канаѓаните го мамат системот, тоа го прават така што општеството има полза.