Ipinamalas ni Pattie Maes ang "Sixth Sense," ang teknolohiyang sinusuot na babago sa lahat

Na-intriga ako sa tanong na kung sakali maari tayong magkaroon o makalikha ng ikaanim na sentido -- isang sentido na makapagbibigay ng walang hanggang access at madaliaang access sa impormasyon, o di kaya'y impormasyon kahit saanman na tutulong sa pagpili natin ng tamang desisyon sa kung anumang bagay. Maaaring ilan sa inyo ang magtataka, hindi ba nagagawa na 'yan ngayon sa cellphone? Pero sa palagay ko hindi pa. Kunwari, may nakilala ka dito sa TED -- ang pinag-uusapang lugar ngayon para makipagnetwork -- hindi mo naman kakamayan ang isang tao tapos sasabihing, "Hintay lang saglit ilalabas ko muna ang phone ko at igo-Google kita?" O kaya naman kunwari sa pamilihan at nakatayo ka sa isang malaking pasilyo na may iba't-ibang uri ng mga toilet paper, hindi mo ilalabas ang cell phone, bubuksan ang browser, at pupunta sa website para makapagpasya kung aling uri ng toilet paper ang pinaka-makakalikasan?

Wala talagang madaling paraan sa ngayon upang kumuha ng kaukulang impormasyon, na tutulong sa atin na gumawa ng tamang desisyon sa anong gagawin at sa susunod na mga hakbang. Kaya, nagsasaliksik kami ng aking grupo sa Media Lab ng ilang mga imbensyon upang ang daloy ng impormasyon ay mapabilis at mapadali, na hindi kailangang ibahin ang paraan ng paggamit nito. Nandito ako upang ibahagi ang bagong bunga ng aming pagsisikap, at ang pinakamatagumpay sa lahat, bagaman ito ay work in progress pa rin. Suot ko ngayon ang isang aparato na pinagsama-sama ang ilang simpleng kasangkapan na madaling bilhin -- at nagkakahalaga ito ng 350 dolyares lamang sa ngayon.

Suot ko ang isang kamera, simpleng webcam, isang portable at de-bateryang projector na may maliit na salamin. Nakakonekta ito sa cell phone sa bulsa ko na nagsisilbing kasangkapan para sa komunikasyon at komputasyon. Sa bidyong ito, mapapanood niyo ang aking estudyante na si Pranav Mistry, ang henyo na kasalukuyang bumubuo at nagdidisenyo ng buong sistema. Sa sistemang ito maaari siyang gumamit ng anumang surface at papaganahin niya lang ang kanyang kamay upang kumuha ng impormasyon at ipo-project na ito sa harapan niya. Sinusubaybayan nito ang apat na mahahalagang daliri. Dito, suot niya ang simpleng takip ng marker na pamilyar sa inyo. Kung gusto mo namang maiba maaari mong pinturahan ng iba't ibang kulay ang inyong mga kuko.

Sinusundan ng kamera ang naturang mga daliri at sinusuri nito ang bawat kilos kaya, halimbawa, gamit ang mapa ng Long Beach, maaaring palakihin o paliitin ang larawan, at iba pa. Alam din ng sistema ang ilang sikat na simbolismo gaya ng "pagkuha ng litrato", kukunan nito ng litrato ang anumang nasa harap mo. Pagbalik niya sa Media Lab, maaari siyang gumamit ng kahit anong uri ng pader at i-project ang lahat ng litratong nakuha niya, ayusin, gawan ng pagkasunod-sunod, palakihin, at iba pa, gamit ang natural na pagkilos ng kamay. Marahil 2 taon na ang nakalipas, nandito ang iba sa inyo at pinakita ni Jeff Han ang kanyang demo at napapa-isip kayo, "' 'Di ba kamukha ito nung Microsoft Surface Table?" Tama, gumagamit din 'yon ng natural na pagkilos, dalawang kamay, at iba pa. Ngunit iba ito sapagkat maari itong gamitin sa anumang uri ng surface, maaari kang magtrabaho sa kahit anumang surface, at pwedeng sa kamay mismo, bakit hindi, at dito mo paglalaruan ang mga datos. Inimbento ang aparato para maging ganap na portable, gaya nito ... (Palakpakan)

Isang mahalagang pagkakaiba nito ay ang pagiging tunay na mobile. Isa pang pagkakaiba ay kung matutuloy ang pangmaramihang produksyon nito hindi lalagpas ang gastos nito sa pangkaraniwang cell phone ngayon at maaring gawing maliit ang imbensyong ito -- halimbawa, mas magandang tingnan kaysa sa suot ko sa leeg ngayon. Maliban sa kakayahang isabuhay ang inyong pangarap na gayahin si Tom Cruise sa "Minority Report," ang tunay na dahilan kung bakit kami nagagalak sa aparatong ito ay dahil maaari itong gamitin bilang ikaanim na sentido na makakapagbigay ng kaukulang impormasyon tungkol sa bagay na nasa harap mo. Mapapanood niyo si Pranav dito na pumunta sa pamilihan upang bumili ng mga paper towel. Dito, agad na susuriin ng sistema ang produktong kanyang dinampot, gamit ang alinmang marker o paghahambing ng mga imahe, at magbibigay ito ng ilaw na kulay berde o kulay kahel. Maaari rin siyang humingi ng karagdagang detalye. Dito, masasabing mahusay ang pagpili ng nagsusuot nito dahil sariling pamantayan ang ginagamit ng sistema. Marahil, pipiliin ng ilan sa inyo dito ang pinakamaputing toilet paper sa halip na piliin ang pinakamakakalikasan.

(Tawanan)

Kung pipili naman siya ng aklat sa tindahan ng mga libro, makukuha niya ang rating sa Amazon -- na naka-project sa mismong pabalat ng aklat. Aklat ito ni Juan, ang naunang ispiker kanina, na may magandang marka sa Amazon. Sa paglipat naman ni Pranav sa mga pahina ng aklat may dagdag impormasyon siyang makukuha -- komento ng ilang mambabasa, mula sa paboritong kritiko, atbp. Kung ililipat niya sa isang partikular na pahina makikita niya ang komentaryo mula sa mga eksperto at dagdag impormasyon tungkol sa anumang mayroon sa pahinang iyon. Sa pagbabasa ng diyaryo -- kailanman hindi na ito maluluma.

(Tawanan)

Maaari mong mapanood ang ilang bidyo-komentaryo sa inyong binabasa Pati ang pinakabagong iskor sa nagaganap na laro, at iba pa. Pinagtatalunan naman namin ang isang 'to.

(Tawanan)

Habang may kausap ka sa TED, may ilang salita na susulpot sa harap mo, gaya ng word cloud, mga salitang may kaugnayan sa taong kausap mo mula sa kanilang mga blog at web page. Halimbawa, dito, malalaman nating mahilig sa kamera, atbp, ang estudyanteng 'to. Habang papunta naman sa paliparan, maari mong malaman sa inyong boarding pass kung na-delay ang flight mo, kung pinalitan ang boarding gate, at iba pa. Kung kailangan mo naman ang oras ngayon guguhit ka lang ng relo -- (Tawanan) (Palakpakan) sa inyong kamay.

'Yun po ang mga nagagawa namin sa ngayon tungo sa paglikha ng pang-anim na sentido na magbibigay-access sa lahat ng kaukulang impormasyon tungkol sa mga bagay-bagay sa paligid natin. Pinapakilala ko si Pranav, na tulad ng sinabi ko, ang henyo sa likod ng lahat ng 'to.

(Palakpakan) (Nagsipagtayo ang lahat sa gitna ng malakas na palakpakan)

Karapat-dapat siyang bigyan ng maraming palakpak dahil sa tingin ko, hindi siya gaanong nakakatulog sa nakalipas na tatlong buwan. Marahil hindi rin masaya ang kanyang kasintahan dahil doon. Pero hindi pa ito tapos, napakarami pa ng mga dapat gawin. Malay natin, pagkatapos ng 10 taon, masasaksihan natin dito ang ikaanim na sentido na nilalagay sa loob ng utak. Salamat.

(Palakpakan)