Graham Hill: Kial mi estas labortaga vegetarano

Antaŭ proksimume unu jaro mi demandis al mi: "Sciante, kion mi scias, kial mi ne estas vegetarano?" Mi cetere ja estas verdulo. Mi pasigis mian junaĝon kun hipiaj gepatroj en ŝtipkabano. Mi komencis retejon nomatan Treehugger. Mi mastrumas tiun aferon. Mi sciis, ke manĝo de nur unu hamburgaĵo ĉiutage povas plialtigi mian mortoriskon je triono. Pri krueleco mi sciis, ke la 10 miliardoj da bestoj, kiujn ni bredas ĉiujare por viando, estas bredataj en fabrika medio, kiun ni hipokrite rifuzus eĉ nur pripensi por niaj propraj katoj, hundoj kaj aliaj dorlotbestoj. Ekologie viando kaŭzas mirige pli da eligaĵoj ol ĉiuj transportiloj kune: aŭtoj, trajnoj, aviadiloj, aŭtobusoj, boatoj: ĉiuj kune. Kaj bovaĵa produktado uzas 100-oble tiom da akvo, kiom plej multaj vegetaĵoj.

Mi ankaŭ sciis, ke mi ne estas sola. Ni, kiel socio, manĝas duoble tiom da viando, kiom en la 50aj jaroj. Do kio iam estis speciala aparta regalaĵo, estas nun multe pli regula, la ĉefaĵo. Do vere ĉiu el tiuj kialoj devus sufiĉi por iĝi vegetarano. Malgraŭ tio min tamen ĉiam denove allogis la granda, kutima bifsteko

Kial do mi prokrastis? Mi konsciis, ke tio, kion mi propagandis, estas solvo duuma. Aŭ vi plu estas viandomanĝanto, aŭ vegetarano. Kaj ŝajne mi nur estis ne tre preta. Imagu vian lastan hamburgaĵon. < ridoj > Pro tio mia prudento, miaj bonaj intencoj konfliktis kun miaj gustoburĝonoj. Kaj mi engaĝiĝis fari tion poste. Kaj kompreneble, tiu posto neniam venis. Ĉu tio sonas konata al vi?

Tial mi scivolis - ĉu eblas tria solvo? Kaj mi pripensadis ĝin. Kaj mi elpensis iun. Kaj mi aplikis tion dum la pasinta jaro, kaj ĝi estas grandioza. Ĝi nomiĝas labortaga vegetaraneco. . La nomo diras ĉion. Neniu viando de lundo ĝis vendredo. Dum la semajnfino vi elektas. Simple. Se vi volas pluiri al la sekva nivelo, memoru, ke la ĉefaj kulpuloj pri ekologia damaĝo kaj sano estas ruĝaj kaj prilaboritaj viandoj. Vi do anstataŭigu tiujn per iu bona, daŭrigeble rikoltita fiŝo. Estas strukturite, do fine simple memorigeble. Kaj akcepteblas ĉesigi ĝin tiam kaj tiam. Konsiderante ĉion, redukti dum kvin tagoj en semajno egalas al 70-procenta redukto de via viandokonsumado.

La programo estas bonega: labortaga vegetarano. Mia piedsigno malpligrandiĝis, mi malpliigas la poluadon. Mi sentas min pli honesta koncerne la bestojn. Mi eĉ ŝparas monon. Plej bone el ĉio: mi estas pli sana, mi scias, ke mi vivos pli longe, kaj mi eĉ perdis ioman pezon.

Do bonvolu demandi al vi, por via sano, por via monujo, por la medio, por la bestoj: kio malhelpas vin doni ŝancon al labortaga vegetarado? Konsiderante ĉion: se ni ĉiuj manĝus duone malpli da viando, estus, kvazaŭ duono el ni estus vegetaranoj.

Dankon.

(Aplaŭdo)